वॉशिग्टन- अमेरिकी राष्ट्राध्यक्षपदासाठीचे रिपब्लिकन पक्षाचे उमेदवार सिनेटर जॉन मॅकेन यांनी जी-आठ समुहात भारताचा समावेश करण्याच्या मागणीला पाठिंबा दिला आहे. जगातील आठ अग्रगण्य अर्थव्यवस्थांच्या या समुहातून रशियाला वगळावे असे मतही त्यांनी व्यक्त केले.
जगातील सर्वाधिक औद्योगिकीकरण झालेल्या लोकशाही राष्ट्रांच्या या समुहात भारतासह ब्राझिलचाही समावेश करावा, असे मॅकेन यांनी सुचविले आहे. लॉस एंजेलिस येथील जागतिक घडामोडींच्या परिषदेत ते परराष्ट्र धोरणावर भाषण करत होते.
जी-आठमध्ये भारताच्या समावेशासाठी समुहातील ब्रिटन आणि फ्रान्स या सदस्यांनी पाठिंबा दर्शविला आहे. जी-आठमध्ये या देशांशिवाय कॅनडा, जर्मनी, इटली. जपान, रशिया आणि अमेरिकेचा समावेश आहे. जी-आठच्या मागील काही बैठकींना आमंत्रित करण्यात आलेल्या पाच देशांच्या गटात भारताचा समावेश असून हा गट जी-आठचा विस्तारित भाग समजला जातो. या विस्तारित गटात भारतासह ब्राझिल, चीन, मेक्सिको आणि दक्षिण आफ्रिकेचा समावेश होतो.
