मुंबई - चलनफुगवट्याच्या दराने गाठलेला सहा टक्क्यांचा आकडा आणि त्या पार्श्वभूमीवर आर्थिक क्षेत्रात निर्माण झालेल्या चिंतेची पर्वा न करता गुंतवणुकदारांनी केलेल्या खरेदीमुळे मुंबई शेअर बाजाराच्या निर्देशांकात शुक्रवारी तब्बल 356 अंकांची वाढ होऊन तो 16,371 अंकांवर बंद झाला. आशियाई तसेच युरोपीय बाजारपेठेतील सकारात्मक वातावरणाचाही आजच्या तेजीला हातभार लागला.
बाजारात या आठवड्याच्या सुरूवातीला आलेल्या तेजीनंतर मात्र कालपर्यंत तसे निराशाजनकच वातावरण होते. त्यामुळे कालपर्यंतच्या दोन दिवसांची मंदी भरुन काढत निर्देशांकात 355.73 अंकांची वाढ होऊन तो 16,371.29 अंकांवर बंद झाला. गेल्या दोन दिवसांत निर्देशांकात 202 अंकांची घसरण झाली होती. दिवसभराच्या कामकाजादरम्यान 16,452.08 अंकांपर्यंत वर गेला होता.
राष्ट्रीय शेअर बाजार निर्देशांकातही आज 111.75 अंकांची वाढ होऊन तो 4,942.00 अंकांवर बंद झाला.
