नवी दिल्ली - देशभरातील हस्तकारागिरांना उत्तम दर्जाच्या आरोग्यसुविधा घेण्यासाठी आर्थिकदृष्ट्या सक्षम करण्यासाठी केंद्र सरकारने आजपासून एका आरोग्यविमा योजनेची सुरुवात केली. आयसीआयसीआय जनरल इन्शुरन्सच्या सहकार्याने ही योजना राबवली जाणार आहे.
राजीव गांधी शिल्पी स्वास्थ्य बिमा योजना असे या योजनेचे नाव असून हस्तकारागिरांसाठीची ही देशातील पहिली योजना आहे. आयसीआयसीआय लोम्बार्डने एका प्रसिद्धीपत्रकात ही माहिती दिली.
ही योजना देशातील मोठ्या प्रमाणावरील हस्तकारागिरांना आरोग्यविम्याच्या कक्षेत आणेल व दुस-या टप्प्यात देशातील आठ लाख 82 हजार हस्तकारागिरांच्या कुटुंबांना या योजनेचा लाभ मिळेल, असे वस्त्रोद्योग मंत्री शंकरसिंग वाघेला यांनी सांगितले.
या योजनेअंतर्गत सर्वसमावेशक आरोग्य सेवा दिली जाणार असून त्यात रुग्णालयात दाखल झाल्यानंतरचे आणि त्याआधीच्या औषधोपचारांसह देशातील एक हजार 700 रुग्णालयातील 505 बाह्य रुग्ण विभागात कोणत्याही खर्चाविना उपचार करता येतील.
