दुबई- भारताचे परराष्ट्र व्यवहार मंत्री प्रणव मुखर्जी यांचे आज येथे आगमन झाले. मुखर्जी तीन दिवसांच्या संयुक्त अरब अमिरात दौ-यावर आहेत. भारत आणि युएइमध्ये चाललेल्या उच्चस्तरीय चर्चेचा भाग म्हणून ते या दौ-यावर आले आहेत.
मुखर्जी दक्षिण आफ्रिकेच्या दौ-यावरून थेट येथे आले. विमानतळावर त्यांच्या स्वागताला भारताचे युएइमधील राजदूत तालमिझ अहमद, दुबईतील वकिलातीचे प्रमुख वेणू राजमणी आणि अन्य अधिकारी उपस्थित होते.
परराष्ट्र मंत्री या दौ-यादरम्यान युएइचे राष्ट्राध्यक्ष शेख खलिफा बिन झायेद अल नाहयान यांची भेट घेणार आहेत. ते युएइचे परराष्ट्र मंत्री शेख अब्दुल्लाह बिन झायेद आणि अबु धाबीचे युवराज शेख मोहम्मद बिन झायेद अल नहयान यांनाही आज भेटणार आहेत.
भारत व युएइ परस्पर व्यापार वाढविण्यासाठी प्रयत्न करत असून आर्थिक संबंध दृढ करण्याच्या उद्देशानेच मुखर्जी या दौ-यावर आले आहेत, असे भारताचे युएइमधील राजदूत अहमद यांनी सांगितले. या दौ-यामध्ये कोणत्याही करारावर स्वाक्ष-या होणे अपेक्षित नसले तरी दोन्ही देशांमधील आर्थिक व राजकीय संबंधांवर चर्चा होणार आहे, असे ते म्हणाले.
