मुंबई - ठाणे लोकसभा पोटनिवडणुकीचा प्रचार टीपेला पोहोचला असतानाच राष्ट्रवादी कॉंग्रेसचे नेते गणेश नाईक हे आपल्या मुलाला या निवडणुकीत विजयी करण्यासाठी पदाचा गैरवापर करीत असल्याचा आरोप शिवसेनेने केला आहे. या निवडणुकीत नाईक यांच्याकडून पैशाची मुक्तहस्ते उधळण होत असून लहान मुलांनाही त्यांनी प्रचारात ओढले आहे, असे शिवसेनेच्या प्रवक्त्या नीलम गो-हे यांनी आज मुंबईत बातमीदारांना सांगितले. नाईक यांची निवडणूक आयोगाकडे तक्रार करणार असल्याचा इशाराही त्यांनी दिला.
ठाण्यातील शिवसेनेचे नेते आनंद दिघे यांच्या अपघाती मृ्त्यूप्रकरणाची फाईल उपमुख्यमंत्री आर.आर. पाटील यांनी खुली करावी, त्यामुळे या प्रकरणातील सत्य बाहेर येईल, असे आव्हानही त्यांनी यावेळी दिले.
