मुंबई - शेवटच्या चेंडूपर्यंत चुरशीच्या झालेल्या सामन्यात पंजाब इलेव्हनने मुंबई इंडियन्सचा अवघ्या एका धावेने पराभव केला. वानखेडे मैदानावर झालेल्या या सामन्यात पंजाब संघाने विजयासाठी ठेवलेल्या 190 धावांच्या लक्ष्याचा पाठलाग करताना कर्णधार सचिन तेंडूलकरसह सलामीवीर जयसूर्याने धडाकेबाज सुरुवात करुन दिली होती.
नाणेफेक जिंकून प्रथम क्षेत्ररक्षण स्वीकारण्याचा कर्णधार सचिन तेंडुलकरचा निर्णय आज सपशेल अपयशी ठरला. सुरुवातीला पंजाबचा पहिला गडी झटपट बाद झाल्यानंतर मात्र मार्श आणि पोमेर्सबाक यांनी दुस-या गड्यासाठी तब्बल 133 धावांची भागीदारी केली. मार्श 81 धावांवर बाद झाला, तर पोमेर्शबाक यांने 50 चेंडूत तडाखेबंद 79 धावा केल्या.
मुंबईच्या चिटणीसला दोन तर पोलॉक व फर्नांडो यांना प्रत्येकी एक गडी बाद करता आला. पंजाबने निर्धारित 20 षटकांत चार गडी बाद 189 धावा केल्या.
