अमरावती- अमरावती रेल्वे स्थानकातून सुटणा-या तीन नवीन रेल्वेगाड्या सुरू करण्याचे आश्वासन मध्य रेल्वेने दिले आहे. रेल्वे मंडळाची मंजुरी मिळाल्यानंतर लगेचच या गाड्या सुरू होतील, असे मध्य रेल्वेच्या एका वरिष्ठ अधिका-यांनी सांगितले.
अमरावती-मुंबई एक्स्प्रेस, अमरावती-सुरत पॅसेंजर व अमरावती-नागपूर इंटरसिटी एक्स्प्रेस या तीन नवीन गाड्या सुरू करण्याचा मध्य रेल्वेचा प्रस्ताव असल्याचे मध्य रेल्वेच्या महाव्यवस्थापक सौम्या राघवन यांनी सांगितले. अमरावती, नवीन अमरावती व बडनेरा रेल्वे स्थानकांच्या तपासणीसाठी राघवन येथे आल्या असताना त्यांनी ही माहिती दिली.
अमरावतीहून निघणा-या या प्रस्तावित रेल्वेगाड्या लवकरच सुरू होणार असल्या तरी अमरावती स्थानकाच्या विकासाचे काम पूर्ण होण्यास थोडा अवधी लागेल असे राघवन म्हणाल्या.
अमरावती-मुंबई एक्स्प्रेस सुरुवातीला आठवड्यातून दोनदा धावणार असून या गाडीला मिळणारा प्रतिसाद बघून नंतर फे-या वाढवल्या जातील, असे राघवन म्हणाल्या. अमरावती-नागपूर इंटरसिटी एक्स्प्रेस आठवड्यातून पाच वेळा- सोमवार ते शुक्रवार- धावणार आहे. ही गाडी सकाळी लवकर अमरावतीहून निघेल व संध्याकाळी नागपूरहून परत निघेल, असे त्यांनी स्पष्ट केले.
