नवी दिल्ली- अणुकराराच्या मुद्दयावर केंद्र सरकारला पाठिंबा देण्याच्या समाजवादी पार्टीच्या निर्णयाशी आपल्या पक्षाचा काही संबंध नाही असे इंडियन नॅशनल लोक दल अर्थात आयएनएलडी अध्यक्ष ओम प्रकाश चौटाला यांनी स्पष्ट केल्यामुळे युएनपीए अर्थात तिस-या आघाडींत फूट पडली असल्याचे स्पष्ट झाले आहे.

कॉंग्रेसने समाजवादी पार्टीचा याअगोदर दोनदा अपमान केला आहे आणि आता सपा नेत्यांना तिस-यांदा अपमान करून घेण्याची इच्छा असेल तर तो त्यांचा निर्णय आहे, असे चौटाला येथे म्हणाले.

आयएनएलडीचा अणुकराराला ठाम विरोध असून या करारामुळे भारत अमेरिकेचा गुलाम होईल असे आपले म्हणणे असल्याचे चौटला म्हणाले.

जेव्हा संयुक्त पुरोगामी आघाडी सत्तेवर आली तेव्हा समाजवादी पक्षाने अपमान सहन करूनही त्यांना पाठिंबा दिला होता. ते कॉंग्रेसच्या सहकार्याने उत्तर प्रदेशात सरकारही चालवत होते, असे चौटाला यांनी नमूद केले. आता पुन्हा एकदा कॉंग्रेस समाजवादी पार्टीचा अपमान करेल, असा इशारा त्यांनी दिला.

युएनपीएच्या तीन जुलै रोजी झालेल्या बैठकीत अणुकरारावर तज्ज्ञांची मते आजमावण्याचा निर्णय झाला होता. मात्र पंतप्रधान मनमोहन सिंग, कॉंग्रेस अध्यक्ष सोनिया गांधी व माजी राष्ट्रपती तसेच अणुशास्त्रज्ञ डॉ. एपीजे अब्दुल कलाम यांना भेटल्यानंतर मुलायम सिंग यादव व अमर सिंग अणुकरार देशहितासाठी आवश्यक असल्याचा राग आळवू लागले आहेत, असे चौटाला म्हणाले.

Source : PTI